Matthew 18

Gotri kwambu aulindau hewen ko tiki namo naha to funda mwasendau

Mk 9:33-37; Lu 9:46-48

1O gisi ki ri himache le tani ya rini wu sawe, “Namo naha to Gotri kwambu aulindau hewen ko tiki funda mwasendau?”

2Wowani Jisas che forini uchawani ri tawani ele ri himache i nindo tiki ya rini esi. 3Wosini ya ri sawe, “Mwe naha ki kunu a sawendau. E, sumbu hukwe kuhi ku hanja'aisini muku pe che sumbu hinga ku sira nambwe nawa, apa ka hewen pe Gotri kwambu aulindau sumbu ki hinde ku raru kumbwa. 4Hima fori hi rihi tini rakaisini do kichapwache hinga ri sirawa rini ele hima fweleni ri dikisini Gotri kwambu aulindau hewen ko tiki rindo apukolaka.

5“E, hima fori ani ni hambwani ka che hinga forini enepeni ratawa, ori hima ani ni enependau.

Kapwa sumbu tito hima sembe handau tini walambe wosindau

Mk 9:42-48; Lu 17:1-2

6“E, ani ni sembe hasindau do kichapwache hinga forini kapwa sumbu mekusiwa ri hichakowa, ori hima miyatapa hinga ti kwele rihi tiki humokuto laka injisini fwa laka ki sa rini rawai. O sumbu hinga rini wosino ti wai hinga, hi tokwe ri raino to kapwa naha.

7“Do nuwe ki dau hima ele, hima leni kapwa sumbu tiki ai wunu ra'aindau keke fiya kapwa naha. Mwe naha, do kapwa sumbu hinga ele mapwa ki sukwandau. Woroti o sumbu hinga wosindau hima, rini fiya kapwa naha. 8E, tapa mihi to'o seke mihi to kapwa sumbu tokwe mini ra'aiwa ma takutoni humbwe'i. Wosiwa tapa funda ri'i seke funda ritombwa dawa ete da ete da himamwale kipe mi torono. Foki tapa fisi'i seke fisi mihi dawa usungwaha da nambwe hi tiki o mini rawaikonda. 9E, miya mihi tito mini rani kapwa sumbu tokwe mini ra'aiwa o miya kapwa ma gorini humbwe'i. Wosini miya funda tombwa dawa ete da ete da himamwale kipe mi torono. Foki miya mihi fisi ete dawa apa mini toroni hi tiki o mini rawaikonda.

10“Kunu hambwafwa'ainda, foki do che hinga fweleni ete ku sawe ki, mini kichapwache. Mina. Hinde wowani, wunu okulandau hewen ko kipe ensel leto wu heisini mwanji ti ai Yapai hewen ko ki dau tambwa ra'aindau. 11[Hinde wowani, dori Hima ri Che ri sikaro ti, ele kapwa sumbu wondau hima leni ai ri rata ki ri sikaro.]

Sipisip yaniro mwanji yepe

Lu 15:3-7

12“Kunu hinde hinga ku hambwandau? E, hima fori sipisip rihi ti 100 hinga dau. Woro fori yanisiwa apa ri waki nambwe sino'o? Mina. Apa ele 99 sipisip kimba ki ri andosini o sipisip funda waniro tini ri ai ri wakino. 13Mwe naha ki kunu a sawendau. Ri wakini o sipisip funda ri heisinimbwa ele 99 sipisip yani nambwe leni dikini ya ri eripe'aripekonda. 14Woro hingambwa apa kui Yapai, hewen ko tiki dau, ri inaka ti do che hinga fori apa humbuno tini ri okokonanda nambwe.

Kapwa sumbu norukwendau sumbu

15“E, mi hiparakambwe fori kapwa sumbu mini wosiwa, ma ini rini ga barikapwa ki linindani kapwa sumbu ri woro ti amwei ma rini sawe. Wowa mi mwanji ri mendiwa, mi hiparakambwe ga tapa ti ma ki anayengunasini sembe wahapi ki ma ki da. 16E, mi mwanji ri mendi nambwe nawa, hima fisi'i funda hinga mi ra ra rini tambwa ma i. O hinga ku wosiwa ri mendi nambwe nawa kunu hima fisi'i namili to koti wono gisi ki mwanji amwei rini ni ku sawekonda. 17Wui mwanji ri mendi ki ri diyahawa sios mekupu hima leni ma sawe. E, Sios mekupu hima lei mwanji okwe ri mendi ki ri diyahawa, ma rini andosiwa ele hoko pe hima hinga takisi ya toro hima hinga sa ri da.

18“Mwe naha ki kunu a sawendau. E, sumbu fweleni do nuwe ki minambwe ku nawa Gotri okwe hewen ko ki o hingambwa ri wosikonda. E, sumbu fweleni do nuwe ki ku ohounawa Gotri okwe hewen ko ki o hingambwa ri wosikonda.

19“Woroti numbo fonga kunu a sawe. E, kunu hima fisi fopi do nuwe ki mwa'ambwe fo keke sembe funda fi hani o mwa'ambwe keke Gotri ni fi uchahambwano ti, ai Yapai hewen ko ki dau ti apa fini ha sindau. 20Ei, hima fisi namili hinga hi ahi tini wu hambwasini michi foki wu wauwa, ani wui nindo tiki a dano.”

Tau ra himache fori hima keke wonda nambwe sumbu

21Ka gisi ki Pita Jisas tambwa tani ya rini sawe, “Apukolaka, ai hiparakambwe fori kapwa sumbu ete ani wosindawa numbo geni kapwa sumbu rihi a rani a humbwe'ino? Ani hambwawani numbo tapa'angi hatachi fisi hinga'a?”

22Wowani Jisas ka hinga ya rini sawe, “Ani numbo tapa'angi hatachi fisi hinga mini a sawenda nambwe. Mina. Mini a sawe, gisi gisi kapwa sumbu mini wosindau hima fo dawa kapwa sumbu rihi ti ma ete rani rumbwe'inda.

23“O hinga keke hewen pe kwambu ti mwanji yepe ki a sawewa ka hinga, king apukolaka foto dau hinga. O king apukolaka ele ya mwa'ambwe rihi nimba ra'airo ri himache lenga ri wonorukwe ki ri hambwasini gisi ti ya ri owe. 24Wosiwani o gisi tawani ri litisini ya mwa'ambwe nimba huwandari ra'aindaro hima leni ya wunu ri sawenda. Wondawani ya ti 10 miliyon kina hinga miyafo naha huwandari ra'aindaro hima ni rini tambwa ya wu rata. 25Woroti wasa ri ai hano ti ya nambwe. Ete wowani king apukolaka kwambu tiki ya rini sawe, ori hima ri che humwe le, e, ri mwa'ambwe lenga ya wungwa ri jisini huwandari ri ra'airo ya mwa'ambwe wasa ai ha ki. 26Ete wowani o tau ra himache king apukolaka mu tiki ri ombungwesini ya rini sawe, ‘Ani keke mi woni ma ani nikisi! Wowa ele ya mwa'ambwe huwandari a ra'airo ti wasa ratani mini a bwe ha.’ 27Wowani o tau ra himache ni aulindau king apukolaka to rini heini rini keke woni huwandari ri ra'aindaro ya mwa'ambwe rini hanja'aisini rini sawewani ya ri i.

28“Ete wowani hoko tokwe ri raruni tau funda fi randau ri nau forini ya ri hei. O ri nau ya ti rini ki huwandari ri ra'airo ti 100 kina hinga. Wosini o tau funda fi randau ri nau ni kwele fu tiki ri toroni ambitonambusini ya ri sawe, ‘Mini ya mwa'ambwe huwandari mi ra'aindaro ti, tinda mi ai hani humburo'o?’

29“O hinga ri bwawani tau funda fi randau ri nau ori seke rakai ombungwesini ya rini sili, ‘Ani keke mi woni ma ani nikisi! Wowa ya mwa'ambwe wasa ratani mini a bwe ha.’ 30Wowani rini diyaha. Wosini o ri nau ni kalapus tiki ya rini rawaru. Wosiwa ya wasa wakini ri hawambwa.

31“Ete wowani ele tau funda wu randau himache fwele o sumbu ni wu heini sembe nomo wu ani rini keke woni wu ini wui king apukolaka ni ele sumbu hinga rini wosindaro tini ya rini wu sawenda. 32Ete wowani o ri tau ra himache ni ri uchasini ya ri sawe, ‘Mini tau ra himache kapwa naha! Metengei mi ani heini mi ichakawani ele huwandari mi ra'aindaro ya mwa'ambwe le mini ani hanja'airo. 33Ani mini keke a woro. Woro mini ga tau funda ki randau nau mihi fori keke o hingambwa mi wopo kipe naha.’ 34Wowani ri apukolaka enge rini ani kalapus aulindau hima lei tapa tenge tiki ya rini ha, wosiwa ele huwandari ri ra'airo ya le tinda ri hawambwa. 35E, kunu okwe kui sembe ki, kui hiparakambwe kunu wosiro kapwa sumbu ku rani ku humbwe nambwe nawa, ai Yapai hewen ko tiki ri dau rini okwe o sumbu hinga tunumbwa kunu wosino.”

Copyright information for KWJ